d waiter 都唔聽書o既

21 July, 2006

約o左C小姐出Whampoa整頭髮，其實我個髮型本身都幾好o架，不過要我日日起身洗頭 gel頭實在太麻煩啦，而且夏天真係好熱好熱，或者，都係直頭髮o岩我~ 夠簡單，唔洗梳唔洗gel !!

是但搵o左間茶餐廳食個 lunch，點知個waiter 醒到咁!
C小姐：一個雞絲米 + 炸蝦餅 + 凍檸茶少甜丫。
Waiter：雞絲米..........em.......
Carmen：一個扎肉烏冬 + 西米糕 + 凍檸茶少甜丫。
Waiter：em............
大口仔：一個焗豬扒飯 + 凍檸茶丫。
Waiter：一個雞絲米..............兩杯凍檸茶........
C小姐：係一個雞絲米，一個扎肉烏冬，一個跟炸蝦餅o既，一個跟西米糕。
Waiter：即係幾多個呀﹖
Carmen：兩個呀，再加一個焗豬扒飯。
Waiter：一個雞絲米........之後咩話﹖(眾人開始你眼望我眼)
大口仔：扎肉烏冬呀! 另加一個焗豬扒飯呀。
Waiter：咁即係..............哦..............雞絲米跟咩呀﹖(大家開始互啤)
C小姐： 炸蝦餅呀..........扎肉烏冬o個個跟西米糕呀!!!
Waiter：哦........................咁即係.........點﹖幾多個呀﹖
C小姐：兩個麵餐呀!!!!!!!!!!! 仲有一個焗豬扒飯呀! (係咪傻o架﹖三個人o係度，咪一人一個飯/麵囉，好難咩﹖)
Waiter：哦........三個.......再加兩個凍檸茶............ (埋頭苦幹寫單，好似好辛苦咁)
Carmen：應該係兩個凍檸茶少甜，一個凍檸茶正常呀.......(你又正唔正常呀﹖)
Waiter：好......

五分鐘後，佢又行埋o黎.........
Waiter：你要咖哩豬扒飯呀可﹖
三個異口同聲：(妖~)係焗豬扒飯呀!!!!!!!!!!!!!!
Carmen：嘩......今次抆水呀，你個炸蝦餅會唔會變o左炸魚餅o架﹖
C小姐：好高可能囉! d凍檸茶會唔會變晒全部正常架﹖

又隔o左五分鐘，兩個麵都o黎o左，但豬扒飯個餐湯都仲未o黎，睇o黎又唔記得o左囉......

到凍檸茶.................兩杯少甜變o左正常，一杯正常變o左太甜..........
真係得個笑字囉~~~ 好難忍到唔笑o者.......

之後三條友呆坐salon，我同C小姐就無得揀啦，郁都唔郁得，大口仔都係得個坐字，順手做埋斟茶遞水呢d粗重工夫......@_@......你真係好啦~~

夜晚 join 埋B 先生四個一齊去o左鋸扒，又再次發生茶餐廳事件......
Waiter：你地幾多個呀﹖
C小姐：四個呀。
Waiter：咁你地呢﹖(指住另外o既客人)
客人A：兩個。
Waiter：你地都係兩個......(指住客人B)............但你地先o既 (指住客人A)，之後到你地(我地四個)
，最後你地兩個(客人B)
B先生：唔係呀，係客人A兩個先，之後客人B兩個，最後我地四個呀......

隔o左兩分鐘......
Waiter：到你地兩個啦。
C小姐：我地四個呀.....
Waiter：下..............你地四個................咁佢地先啦 (指住客人A)，下一個到你地o架啦。
Carmen：下一個係到客人B呀，我地係最後o架......

又過o左兩分鐘......
Waiter：有半邊卡位坐唔坐﹖
C小姐：下﹖半邊﹖四個坐半邊?!?!?!?!?!?!
Waiter：下﹖你地四個﹖咁佢地先啦 (指住客人B)。

我而家先知道，原來四個人，係可以坐到半邊卡位喔~~
今日d waiter 個個都唔聽書喎~