呢d人會有報應的

15th July, 06

臨收工前，有人遺棄o左一隻兔仔o係我地公司。
接收o個個係S小姐，佢話o個個人話o係公園執到隻兔仔，但S小姐覺得係呢個人自己唔想養而遺棄佢喎........anyway........

我明白有時真係會有某d原因而唔可以再keep 自己o既寵物，但係將佢地遺棄o係街度，又或者掉佢地o係垃圾桶，絕對係極度不負責任o既行為，呢d人一定會有報應的。

我聽過有人o係坑渠執到隻兔BB，有人o係垃圾房執到兔仔，有人將貓BB放o係紙袋入面再封實佢掉o係垃圾房，有人將隻斷o左翼o既大鸚鵡連籠掉o係垃圾站，而我，就試過同D小姐o係屋苑捉o左隻俾人「放生」o既兔仔，又試過o係垃圾桶入面執到兩隻o岩o岩出世，臍帶都未甩o既貓仔，呢d一切一切，正好話俾我地知，呢個世界上有幾多無人性，自私，不負責任又不知所謂o既人。

呢d事，每年每日每分鐘都會發生，我見到o既，只係千千萬萬被遺棄o既冰山一角，我深明無可能可以幫到每一隻小動物，但假如我見到佢地o係垃圾桶，被人當垃圾咁送去堆田，我又可以當乜都睇唔到嘛﹖

動物都係生命，正如我多年前所說：世界上每一條生命，都應該得到尊重同尊嚴!